كيفية حساب نقط التقاعد في الضمان الاجتماعي 2020 CNSS

نشرح ليكم كيفاش تحسب التقاعد ديالك او تحسب للاب او الام ديالك...هدشي بالنسبة لناس لي خدامين فالقطاع الخاص (CNSS) اما القطاع العام عندهم صندوق اخور لي هو CNOPS, .. المهم فهد دردشة غتلقاو الاجابة على هد العناوين التالية.


 اولا: شروط الاستفادة من cnss وشحال كتخلس انت كعامل فهد الصندوق كل شهر وشحال كيخلص عليك المشغل ديالك وشحال خص يكون عندك من نقطة.

 تانيا:كيفاش تحسب المبلغ تقاعد (هنا غيكون شوية ديال الحساب خفيف.) 

ثالثا: واش من حق تسترجع التعويضات ديالك في حالة ماوصلتيش مجموع النقط القانوني باش تستافد من التقاعد.

 نبداو فالشرح

 اولا: cnss او الصندوق الوطني للضمان الاجتماعي صندوق . كيقدم مجموعة من الخدمات للموطنين (لي خدامين فالقطاع الخاص) من بينها التعويض على فقدان الشغل، الحصول على تقاعد.... المهم المشاركة ف cnss اجباري على جميع الشركات فالمغرب و بمعنى اخر اجباري على اي عامل فالقطاع الخاص يكون عندو بدون استثناء ؛ بمجرد ماكتبدا العمل فشي شركة خصهم يدكلاريو بيك ف cnss بقوة القانون. وخى شحال كنساهم انا كعامل ف cnss باش نشد تقاعد كتساهم تقريبا ب 6.7 فالمئة من الصلير (مايسمى ب SBI ) . و المشغل ديالك كيخلص عليك كدالك تقريبا 21% من (SBI) . تانيا: كيفاش تحسب التقاعد ديالك . كيخصك تكون وصلتي ل 60 سنة . وخصك تكون جمعتي 3240 نقطة ( نقطة كيقصدو بها يوم عمل) بمعنى خصك تكون خدمتي 3240 يوم دكلاري .
 لي ممكن تجمعها ف تقريبا 11 عام من العمل المتواصل. 3240 نقطة كيعطيك الحق تستافد بتقاعد ديال 50% ديال الصلير المتوسط باش كنتي خدام 8 سنوات الاخيرة( 96 شهر) نعطيك متال : اخر 96 شهر خدمتي ب 5000 درهم. كناخدو هد 5000 درهم ضارب 50% غتعطينا تقاعد ديال 2500 درهم . لكن السؤال لي ممكن تسول دبا هو الا متلا وصلتي ل كتر من 3240 نقطة. متلا 5000 نقطة واش غضيع فالنقاط لي شايطين؟ طبعا لا هنا cnss كتقول ليك على كل 216 نقطة زايدة على 3240 غنزيدك 1% على 50% . نفترض انت وصلتي ل 5000 نقطة : كناخدو 5000 ناقص 3240 تساوي 1760. كناخدو هد 1760 لي شاط كنقسموها على 212 تساوي 8.3 %. يعني غتزيدك 8.3% على 50% لي ديجا غتاخد و غتعطينا 58.30. ونفترض تخلصتي ف اخر 96 شهر بصلير ديال 5000 درهم . كناخدو 5000 ضارب 58.3% غتعطينا تقاعد ديال 2915 درهم. ساهل نتمنى تكونو فهمتو. غير للمعلومة اكبر نسبة ممكن توصل ليها هيا 70% بمعنى اخر اكبر صلير تقاعد ممكن توصل ليه هو 4200 درهم شهريا. للمعلومة ايضا واش الى بغيت متلا يكون عندي تقاعد كبر من 4200 درهم واش من حقي. غنجوبك اه طبعا لكن خصك تكون متلا مشتارك فصندوق CIMR حتى هدو كتخلص فيه كل شهر وفاش كتوصل لتقاعد ديالك كيزيدوك شي بركة فالصلير على حسب انت شحال بغيتي وشحال كنتي كتخلص ليهم. ( غير هو هد CIMR ختياري ماشي اجباري. CNSS هو لي اجباري). ثالثا: واش من حقي نسترجع التعويضات ديالي في حالة ماوصلتش ل 3240 نقطة: هنا cnss دايرة ليك 2 ديال الاختيارات: الاختيار الاول : التأمين الاختياري يائما تكمل النقاط لي خاصينك بالفلوس و كيتسمى التأمين الاختياري وضروري تكون جمعتي على الاقل 1080 نقطة وضروري ايضا تكون وقفتي على الخدمة وضروري ايضا دير طلب في غضون عام من نهار وقفتي على الخدمة. و الاختيار التاني : استرجاع مبلغ الاشتراكات هنا cnss كتقول ليك من حقك ترجع الفلوس لي كنتي كتخلص ليا بشرط كون وصلتي ل 60 سنة و ماتكونش خدام وماتكونس ستفدتي من شي معاش كتعطيه او كتقترحو cnss. (هنا متلا الا قدر الله شي أب او أم توفات راه من حق دوي الحقوق يطالبو بسترجاع الاشتراكات. )

 نتمنى يكونو المعلومات واضحين. والسلام.